[ 櫻 • 京都大阪 2012 ] Day 7: 醍醐寺 + 宇治平等院 + 白川 + 道頓堀 + 法善寺橫丁

經過一輪網上搜查之外，今日還是依行程去【醍醐寺】(http://www.daigoji.or.jp/)同【平等院】(http://www.byodoin.or.jp/)。最初還擔心呢次獵“櫻”會冇獵物，不過係冇咩野期待之下旅行其實總會有少少驚喜。

一早起身check out 同寄存行李後，就搭地鐵東西線搭車去【醍醐寺】，正值賞花季節，地鐵站有shuttle bus 直接去醍醐寺，唔使行上山咁辛苦。一入【大玄關】寺門就見到兩棵大大櫻花樹，好多人影緊相，長短火微距閃燈樣樣齊，可惜天氣唔太理想，光線若有若無，要揾位同等陽光都真係少d 耐性都唔得，不過個場越來越旺，只好轉移陣地。步入【憲深林苑】又有另一片景象，一排十幾棵盛放中嘅櫻花樹好似一個活生生嘅粉紅色佈景板放係眼前，前排仲添置桌椅供人一邊賞花，一邊歎綠茶菓點，寫意。

影下歎下又去下一個“影”點 –【仁王門】，因為見到隔離呢扇“門”又有一棵靚櫻花種左喺門口，唔理三七廿一又衝左入去。今次中左計，呢個院唔多櫻花，只有一棵大櫻花撐場，不過有【五重塔】同【弁天堂】撐場，感覺古雅清幽，同剛才密密麻麻遊客區大不相同。最後衝入【寶靈館】，呢度最精采莫過院中最深深處的一棵百年垂櫻。無盡的櫻花沿著樹枝橫向伸展，壓下那一根根柔弱嘅樹枝，隨風擺動，呢個迷人景致真喺喚醒左全場相機嘅快門。我努力擠到前排影相，用那支sigma 10-20mm 不停咁影影影影影，此刻天公造美，太陽又從雲中出來，過足癮!

午後離開醍醐寺，繼續搭JR到宇治【平等院】(http://www.byodoin.or.jp/)，當然一落車要先拜訪一下【中村藤吉】(http://www.tokichi.jp/)同享用一下呢度嘅特食小食。鋪裡邊坐滿了人，羊太太好有target咁一坐低就刨menu 同點菜 : “茶蕎麥冷麵套餐” + “抹茶わらびもち”，好味道。可惜身旁有一對強國“美女”一身名牌咁玩住iphone，打擾本大爺嘅雅興。

今次到【平等院】找不到令人震撼的櫻花，但每當舉起相機影【鳳凰堂】時，總會有一棵兩棵櫻花喺一旁點綴下，加埋屋簷上一雙鳳凰，毛毛細雨下，甚有詩意。可惜池塘泛起漣漪，影唔到【鳳凰堂】嘅倒影……

雨越落越大，急急腳回京都，慌不擇路，竟發現傳說中【白川】，呢度好多櫻花，密密麻麻，成條路好似由花瓣鋪砌出嚟咁，正好有一對港人拍緊婚紗相，個攝影師好熟練教佢哋擺post，我估個攝影師父一年都應該影唔少呢d相，當然豎起耳仔偷下師。話時話，好彩我結婚時冇影過，見到個準新郎哥又要跪地，又要背老婆跑，真心寒。

由京都去大阪要一個鐘，不過今日幾攰，好似瞓醒就到，到步後就要揾酒店位置，今次呢間酒店叫【MyStays Inn Sakaisuji-Honmachi】(http://www.wmt.co.jp/en/location/msi_sakaisujihonmachi/index.html) ，跟京都嗰間同一公司，但地理上同交通上都好唔方便。冇計，揾唔到其他酒店。間房成大陣煙味，要自己去買空氣清新劑頂一頂。安頓好後就出發去【道頓崛】揾食，今次喺法善寺横丁揾左一間【松阪牛燒肉M】(http://www.matsusaka-projects.com/hozenji/index.html)，叫左一個【5800円コース】，有特選4種～霜降～松阪牛同松阪牛赤身肉壽司 (詳見http://r.gnavi.co.jp/c536000/menu5.html)，超美味，雖然埋單要成 ¥12520，不過都算為是日旅程劃上完美嘅句號。