[ 櫻 • 京都大阪 2012 ] Day 5: 清水寺 + 三年坂

第二朝好精神，去左公家嘅温泉浸下身，點知呢度一個人都冇，被我包場，一個人赤條條對住個日本海都幾過癮！


好唔捨得check out ，但係酒店d服務員好準時，仲安排好車送我咩去火車站。一路上天氣不錯，藍天白雲，點知一到火車站，大大張告示話刮緊大風，火車停駛，(註׃ 呢架火車得一卡，好細好舊，似日本寫真成日取景個款舊車箱。) omg！點算！唔通等到風停咩！外邊有一個巴士站，但冇車返京都，急急急，打電話返酒店求救，又怕言語不通，羊太太膽粗粗對住個聽筒講左一句日文，好彩聽電話位仁兄正正就喺尋日那個位接侍員，佢仲記得 “羊” san，真係喜出望外，佢叫坐個司機返火車站幫我哋，可惜呢位司機san 又唔識英文，等下等下，有個電話揾我，我正猶疑之際，電話傳過來一把幾流利英詞嘅女聲，(店主之女)， 原來酒店幫我揾左方法返京都，仲叫埋個司機伯伯車我哋去另一個地方搭車。太殷勤了。

一路上天氣越來越差，雨落得好大。最後司機伯伯都安全送呢兩隻羊咩去到火車站，呢個火車站屬另一條線，個伯伯仲幫我哋揾左個識少少英文嘅火車姐姐幫手，肯定埋有車返京都先走，真唔話得。

比原定時間遲左約個幾鐘返到京都開酒店，沿路去左伊勢丹買左便當食，今日心情起伏都幾大，胃口都大左，一舊舊飯塞晒入口都好似冇咩野落左肚。

肚空空都要依行程出發，今日決定去清水寺 (http://www.kiyomizudera.or.jp/)。呢間寺坐落半山，由巴士站行上去都幾攰，行到中途有棵被悉心照顧嘅「垂枝櫻」開得異常搶眼，勁多遊客同團友停低影相，正是三年坂的【明保野亭】店 (http://r.tabelog.com/kyoto/A2603/A260301/26001621/dtlrvwlst/3819933/)。今日得見櫻花盛放，心情又高漲起嚟。

天開始黑上，燈光打在清水寺上，好有詩意，可惜打在櫻花樹上的光卻把光禿禿的樹幹表露無遺，真掃興。反而行到去奧之院前見到一堆堆遊人影那個postcard checkpoint 。今晚好大風，寺內又唔俾用腳架，要影呢個checkpoint 都幾考定力。我試左好耐，真係投晒降。最後仲要落大雨，唯有鳴金收兵。

> 一撤退，個肚就打鼓起來，又凍又餓又攰，點知周圍d 舖頭都閂左門，最尾見到一間仲開緊，雖然裡面冇食客，又唔知食咩，但都照衝入去，坐低先發覺舖外個view 好熟，點解，【明保野亭】是也！豆腐料理again！盛惠 ¥ 2,940！