[ 櫻 • 京都大阪 2012 ] Day 8: 奈良公園 + 海遊館

今日行程焦點由植物改為動物。坐地鐵到左奈良公園(http://www.pref.nara.jp/dd_aspx_menuid-1713.htm)，好快就見到今日嘅主角 - “nana鹿”。個細路仔好鬼大膽咁hold住塊餅乾，三四隻鹿都湧埋去，d大鹿仲狼死到擒上個細老度，羊太太睇到好肉緊，好能個細路仔玩慣玩熟，一於少理，淡淡定慢慢餵，我真係服晒佢。唔好見一路上都有好多鹿好悠閒咁，其實隻隻個鼻都好靈，一嗅到餅乾味就會起勢跟，好多遊客都嚇到哇哇聲，當然要感受下被一大羣鹿圍住搶食同埋要影相，個個遊客都好樂意嗌下。

附近的【氷室神社】有櫻花盛放中，我哋當然好自動咁埋去影下相。呢幾日見到d 櫻花路路續續咁開，雖然今日落緊雨，不過心情都開心d，最後都要去附近揾間野食午飯等雨停。遊客中心有抗地震嘅展覽，幾得意，羊太太對款款design都好有興趣。【東大寺】(http://www.todaiji.or.jp/)內都有一棵大大的櫻花樹，門口望入去時非常搶眼。不過寺內那大佛仲搶鏡，好多善信參拜，寺裡邊還有好幾個歷年來東大寺的模型，個個模型中央都有一個小佛像，不過廟入面幾暗，好難用相機張佢地一個個記低 - 唔好用閃光燈啦。呢度有條棟樑有一個大窿，由於係正地面，好多大人細路都會去“鑽”過去，唔知為乜呢! 

臨走時經過【天平庵】 (http://www.tenpyoan.com/)，貪食嘅羊太太當然唔會錯過，一口氣買左五件菓子(草莓)同柏餅，睇到佢個幸褔滿瀉個食相就知好好食。

由奈良出發去【海遊館】(http://www.kaiyukan.com/index.html)要成粒鐘。個魚缸好大，不停咁由高層至低層氹氹轉落去，起初都睇到嘩嘩聲，見到個堆魚游來游去不知幾捨意咁，但最尾都有點悶，事關佢哋游極都係同一條path，加埋背上一大堆鏡頭無用武之地 (魚缸玻璃大反光)，我最後都冇mood，只等羊太太一聲號令閃人。

睇完魚當然去食魚，今晚去黑門市場 (http://www.kuromon.com/) 間【浜藤】 (http://www.hamatou.jp/) 食雞泡魚，有刺身同鍋飯…。第一次食雞泡魚，幾新鮮，肉質韌韌地，連埋個湯飯真喺食得好飽，都唔係太貴，大約 ¥5500，今晚間舖好少人，仲可以坐個位對住十幾廿條游來游去嘅雞泡魚靜靜地開餐，幾得意。黑門市場夜晚好冷清，得一兩間舖頭仲開緊，都係超市一類商舖，入面賣d 肥牛都幾平幾靚，下次可以帶埋個電煲嚟打邊爐。