[ 櫻 • 京都大阪 2012 ] Day 6: 嵐山 + 竹林 + 天龍寺 + 渡月橋 + 東寺

今日出發去傳說中櫻花盛放嘅嵐山遊山玩水一下。傳說就係傳說，上網見到嵯峨野觀光火車(http://www.sagano-kanko.co.jp/) 跟周邊景色真係幾吸引。今次由嵯峨站出發，幾十分鐘就到達亀岡駅，原途只見到山川河溪，同想象嘅畫面差好遠，因為冇櫻花點綴下，呢個山頭對我來講真的平平無奇，原本要靜心欣賞之物，也因為火車嘅吵耳聲只能擦身而過。我對呢段火車旅程幾失望，全程都冇啓動過個 “快門”。

回程係嵐山站落車，一落車就被炒栗子吸引，一包熱辣辣栗子一瞬間就成為我腸中之物，一抒烏氣。不一會就到竹林，一條小徑兩排竹，竹樹高聳入雲，擋住猛烈旣陽光，竹影搖曳，沙沙聲清脆入耳，此刻心情不再鬱悶，終令我重新開動我部50d。步出竹林，天龍寺 (http://www.tenryuji.com/) 就係眼前，反正心無所求 -“櫻”，就順路入去參觀一下。呢間天龍寺冇天龍八部，但有好多盛於嘅花花，當然還有幾棵悉心栽培嘅櫻花，心情靚返晒。 天龍寺都唔算好大，但就揾唔到入口去寺堂，好奇怪，最尾放棄左，就去揾午餐醫肚。JR嵐山駅呢度好多野食，今餐簡單咁食左烏冬同黑墨魚丸，普普通通，【新八茶屋】 (http://www.sinpachi.com/) 食綠茶雪榚，不錯。

食完就去渡月橋(http://www.eonet.ne.jp/~umearasi/)，今日天氣好好，成個河面被照得閃閃下，河水經過堤壩時水聲隆隆，幾有氣勢。其實幾想遊下船河，但好似呢個季節仲未開，架架船仔都泊左係岸邊晒太陽。不知不覺已經三點幾，羊太太本想去東映太秦映畫村 (http://www.toei-eigamura.com)一轉，但門票同時間(收五點)又好似唔多化算，結果就坐住架火車隨心而行。路山突然見到一寺盛放著櫻花，唔理三七廿一就落左火車，正是廣隆寺 (http://www.kyoto-kankodo.com/kyoto_spots/ukyouku_miru/koryuji/)。小弟其實只被寺中櫻花所吸引，冇想過廣隆寺有咩來龍去脈，實不知那裡收藏著微笑彌勒同哭泣彌勒，唯有上網睇返。

回到京東駅，見時間尚早，打算去東寺(http://www.toji.or.jp/)逛一逛。點知地圖上嘅彈丸之地卻花了我們不少精力同時間，最後坐左一個站火車去東寺駅，到達之時個天都黑齊，名符其實的賞夜櫻。今晚人唔多，得小猫三四雙，可以set 腳架慢慢影，門口有一棵大大櫻花 - 【不二櫻】，係人工催谷下正盛放中，但燈光不太好，影相有少少難度。五重塔跟周邊建築都打左燈，加上似有還無嘅夜櫻，再加上平靜如鏡嘅池塘，謀殺左我唔少 “菲林”。

影得興起，羊太太提議去三年坂影多一轉，小弟當然奉陪。是晚玩都冇食晚飯，只好去酒店附近間【炭火燒】(http://www.watamifoodservice.jp/wataminchi/) 食夜宵 ! 有鷄有牛有馬肉有飯團仲有酒 ！