追櫻之旅接近尾聲，為爭取更多賞櫻機會，羊太太決定取消去吉野山，改去【大井關公園】 (http://www.kankou-izumisano.jp/iyashi/ooisekipark.html)，(因為上網見吉野山櫻花未好，反而大井關就全開)。前一晚羊太太好累，一早就上床瞓左，交通安排都由我負責，由於事前全無準備，我都開左少少夜車做功課。
今日一早坐JR到根野駅，再坐犬鳴山巴士於「東上」站下車，車程約十分鐘。不過落左車先出事，因為呢道唔喺遊客區，路標只有一個，今次當然被老點左行錯路，揾路揾大半個鐘，又熱又曬，原來個公園係【日根神社】後面，而神社又係落車位嘅回頭路上，仲要被一排樹遮住晒，好彩最尾有個後生仔帶路先揾到。
一如網上資料所說，【大井關公園】嘅櫻花正盛放中，能一睹花海氣勢逼人嘅實況，真幸運，可能第二日先有櫻花祭，今日冇乜人，只有一對老公公老婆婆拿了便當來賞花，還有一家人一家大細喺遊樂場玩，呢兩個畫面都充滿著櫻花帶來嘅祝福。天氣又好，我哋呢兩隻大細路當然係度大影特影一番。
玩左好耐都唔太捨得走，最後因為要揾午飯食所以先出發入"城" 去【四天王寺】(http://www.shitennoji.or.jp) 。先係商場隨意食左個海鮮大阪燒，熱辣辣好味道。【四天王寺】嘅櫻花當然唔及【大井關公園】咁多，不過量少唔等於矜貴，因為呢處多左一大堆採花賊 - 麻雀。佢哋不停咁啄D 櫻花，可憐嘅櫻花就咁一朵朵被呢堆採花雀拔晒出嚟之後又隨處飄下，成個地下同水池都鋪滿花瓣，無情嗎？心傷嗎？
好唔容易先背住一大堆鏡頭去到【梅田空中庭園展望台】(http://www.kuchu-teien.com/) 睇日落，呢處有四十樓咁高，風好大，ENJOY 完個日落先醒起冇帶支腳架，OMG。大阪個夜景都好正，可惜可惜，唯有欣賞一下人哋個幾支粗“腳＂。
最後一晚係日本，最後晚餐當然要食好Ｄ，去【滝見小路】怱怱轉左一個圈冇咩著落，就馬上出發去【道頓堀】間【道樂】（http://douraku.co.jp/）去拆蟹。點左個 “十三夜(Juusanya)”，當然yummy，有雪蟹同帝王蟹，不過杯蟹味嘅日本酒真係唔提唔得，蟹味好濃！又有燒酒味，正！(http://douraku.co.jp.c.at.hp.transer.com/kansai/news/2011/03/110328-honten-drink.html) ¥760 ，值得淺嚐一下。是晚仲有個香港留學生服招呼我哋，唔使雞同鴨講，食得和味，埋單就要 ¥13485。肉痛? 難得一次半次冇所謂啦 !
 |  |  |
 |  |  |
 |  |  |
 |  |  |
 |  |  |
沒有留言:
發佈留言