[ 櫻 • 京都大阪 2012 ] Day 4: 天橋立 + 網野

天橋立(http://www.amanohashidate.jp/area_hashidate.html)，那個人人屁股翹起之地，當然要去朝聖一下。一早起身check out 同寄存好行李，就到京都駅坐JR 出發。上火車前買左一盒便當早餐，羊太太終於買到網上流傳的賣罐裝粟米的自動販賣機，當然順理成章又撳左一罐出嚟食。咁次發現JR 火車d座位可以360度咁轉，由二人座變做四人座，幾得意。

兩個幾鐘到天橋立，先搭只有兩個迷你車箱嘅纜車上飛龍觀展望台 (http://www.viewland.jp/) 今日天氣不錯，一上到頂就見到好幾對屁股，呢個角度望天橋立似一條垂直線連到對岸，左右兩邊湖水係唔同顏色，再加上一個個相連的弧形沙灘，有d鬥獸棋嘅楚河漢界feel，對峙分明。今日天公造美，能一覽天橋立初春景色，“飛龍” 我就幻想唔到，櫻花樹都喺光秃秃的，不過忽然有個想法，唔知冬天呢度似唔似杭州西湖斷橋殘雪?

玩左一陣見有時間就坐快艇去對岸松傘公園 (http://www.amano-hashidate.com/index.html)，原本坐觀光船要十二分鐘，而家快左一倍，真係超快超爽。上岸個陣都要定一定神，好彩遠處班細路掛住拾蜆，冇望過嚟笑呢對傻老傻婆。從松傘公園望天橋立是橫向的，似有一條小路通住一個大山一樣，有d 似打機去城堡打大佬嗰d feel。松傘公園有個松子頭公仔同佢個人燒，都幾好味。食完就趕返架大飛閃人。

唉，大飛雖快，但去到火車站已經miss 左班火車，要等一個鐘先有下一班。原本約好酒店d 人pick up ，一時間唔知點算，你眼望我眼左一陣，走去詢問處揾人聯絡酒店，嘰哩咕咾指手劃腳左一陣，終於有個識英文嘅姐姐仔幫手，太好了。

•••• •••• ••••

比原定時間遲左一個鐘到網野駅，一落火車就見到酒店個服務員著晒成套和服等緊我哋，我幾肯定佢喺全酒店唯一一個識英文嘅員工，都ok 啦，佢一見到我都認到我，肯定我個look似喺全酒店嗰日唯一一個唔識日文嘅客人。佢見到我哋都好熱情幫我擺行李。由火車站去酒店要廿幾分鐘，後半段喺沿住懸崖嘅高速，剛好夕陽西下，眼看著日本海，一時間有種複雜嘅感覺湧上心頭，難以形容。

今晚間酒店叫【炭平】(http://www.sumihei.com/)，呢度遠離市區，對住日本海，個view就真夠開揚。間房仲誇張，呢間房叫“波乃音”，有私人露天風呂不在話下，日式客廳同房間又大又舒服，成家人住都得。玩在一陣就出去睇日落，個鹹蛋黃唔駛幾分鐘就消失左，下次一定要比日落時間早d去準備！ 點知幾點？ 店員會張每日日落時間寫喺張memo度，夠晒貼心。

影完日落當然去開餐，住得咁豪，晚餐都有專人服侍留係自己房間享用，今晚呢位私廚唔太識英文，成晚同我哋玩猜猜劃劃問我哋d食法，我智質同領悟力都極低，呢個遊戲由羊太太接手，最後今晚嘅海鮮餐有魚生拼盤有海蝦有海膽有鮑魚仲有和牛 … 真yummy。，食飽飽，浸埋個温泉，疲勞盡消。