[ 櫻 • 京都大阪 2012 ] Day 10: 大阪城公園 + 櫻之宮

最後一日，因為酒店位置唔太方便，決定一大清早就Check out，拖住所有行李去大阪(梅田)站揾Locker放。由於個站太大，都要揾左一段時間先揾到Locker，好彩有大ＳＩＺＥ放行李，否則就真係頭痕。一切安頓之後都成十一點幾，索性食埋午飯先去博殺。今次上左十四樓嘅美食區幫襯左【串乃家】(http://www.kushinoya.jp/jp/index.html)食串揚料理，都幾好味，因為夠晒熱辣辣，仲有幾款唔同醬汁配搭，個女侍應好努力運用佢學過嘅英文同手勢介紹D食物同點邊款汁，我哋當然好少理，亂點一餐。點左一set串串同一個定食就要 ¥3460，都幾貴，不過間舖堆滿人，可能幾出名啩!

醫完肚就出發去【大阪城】(http://www.osakacastle.net/hantai/)，一出地鐵站就見到呢度人山人海，加上今日超猛太陽，(十日以來最熱今日!)，加埋兩旁嘅串燒食嘅熱力，可謂熱浪逼人。原來今日太阪城公園櫻花處處，好多人一家大細，又或三五知己都趕過來賞花同bbq。花海加上人海，要去大阪城天守閣都花左一段時間，排隊上天守閣條龍尾都唔知排左去邊，最後放棄左。搭車回程時喺櫻之宮站落左車，由月台望落【毛馬櫻之宮公園】，可以見到河岸兩排櫻花密密麻麻的伸向遠處，可惜唔多夠時間，冇得落去enjoy一下。

到左伊丹空港，我哋盡最後努力shopping: 豚骨杯麵，伊右衛門煎茶(http://www.suntory.co.jp/softdrink/iyemon/)，點天餃子(http://www.tenten.co.jp/)，大學芋……滿載而歸。