十一月中 – 重傷的天鵝 @ 新天鵝堡 (Neuschwanstein, Germany)

新天鵝堡係本人一直想去拜訪的地方，今次到德國工幹，自自然然將佢列入行程之中。星期五一放工就坐六個鐘火車(http://reiseauskunft.bahn.de)由 Heidelberg到 Füssen，一個去新天鵝堡必經的小城市 (http://www.fuessen.de/244.0.html)。先留一晚，第二日再去影相。其實事前都驚冇時間，準備功課冇咩點做，隨心啦。

火車到Füssen 以經夜晚十二點幾，之前訂左 Hotel Fantasia (http://www.hotelfantasia.de/)，不過佢十二點後閂門，安排左我去附近間 Hotel Sonnie (http://www.hotel-fuessen.de/)，呢間酒店唔錯，位於十字路口，一出火車站行五分鐘就到。今次住一人房，房間唔大，地方乾淨，張床都唔錯。可能係淡季，房間唔太緊張，免費升級真爽。

第二朝七點幾就出發，先去火車站隔離既巴士站搭巴士上山，Bus 73/78 (Timetable: http://www.rvo-bus.de/site/rvo__bus/de/fahrplan__information/fahrplaene/suche/fpl/72__73Teilstrecke.pdf) 非常易揾，車票幾錢就唔幾得，不過可以問司機，十個有九個乘客(查實都係遊客)都問佢，佢都好有耐性幫人。巴士時遇到一班台灣人同大陸人，傾傾下就一齊出發搭車上山。

架巴士唔使十分鐘就到售票處，(不過都要行多五六分鐘)，售票處賣新舊天鵝堡個tour，唔買就冇得入去城堡參觀 。 個tour有多國語言，時間就要預返多一粒鐘，因為由售票處去新天鵝堡條山路幾斜，行上去要差唔多成個鐘，再唔係都可以坐馬車，馬車會等多人先開 (~8人)，記得係售票處攞埋張地圖先好走 (map: http://www.schwangau.de/neuschwanstein-castle-628.html)。


一行人嘻嘻哈哈行上城堡，一顆心機乎停左落嚟，事關個城堡有成幅牆搭晒棚架維修緊，有興趣到此一遊既老友請做好心理準備。好彩個正門仲見得下人，我哋係門口玩左好耐等入城。城堡入面有幾裝潢，呢度唔多講，當然同北京故宮好唔同，各有各精彩。

平時上網見到新天鵝堡，來來去去都係嗰幾個shots ，跟呢度d名信片差唔多，今次一遊，發覺原來圍住城堡都係懸崖峭壁，可以影相既角度真係唔多: 正門，後山鐵橋，後山 (沿住橋一直行就見到上山條小徑，路程約二十分鐘，唔好貪方便抄小徑，有班同志們因此迷路，要係山頭大叫大嚷呼喚同伴，真失禮!) 。時間匆匆，又見到一層層棚架，都冇咩心機揾其他地方影相。

今朝個太陽喺後山升山嚟，成十一點都未曬到落個城堡，要從鐵橋影新天鵝堡唔太好影，返而上到山腰時間啱啱好。當一個人行上到山腰見到新舊天鵝堡，Alpsee，河流，小鎮，山巒，加埋“秋色”，真係何其壯觀! (註: 剛好呢個角度d 棚架唔顯眼)


舊天鵝堡冇新天鵝堡咁豪，但入面擺放的文物一d都唔輸蝕，最不可思議係個放左幾百年既大麵包

。

睇完新舊天鵝堡，都係下畫三四點，坐返巴士落Füssen四圍行行，個鎮好細，不過都有幾多特色舖仔，可惜太早收舖唔夠盡興。

十一月 "慢遊" 德國海德堡 (Heidelberg, Germany)

返左新工個多月，終於要飛去公司總部報到，地點係德國海德堡 (Heidelberg)。由於要去成十日，有個週未可以玩下，我就帶住部50d 同 24-105 一齊飛。

海德堡離法蘭克福 (Frankfurt) 約一個小時車程，今次總公司安排左shuttle同酒店，唔使自己搭火車咁辛苦。不過，當坐完十三個鐘機再一個鐘車，由一個有三十幾度天氣既星球去另一個夜晚只得零下幾度城市，骨頭散晒之如，仲感受到時差同温差嗰種威力。

今次住酒店叫 Hip Hotel (http://www.hip-hotel.de/en/)，唔錯，間間房唔同設計，不過我覺得d光太黃，做文書唔夠光，旅行就真唔錯，位於舊城遊客區之如，個門口仲有兩個米芝蓮logos，多謝老細。

海德堡唔太大，景點都集中係舊城區 (http://www.tourism-heidelberg.com/)，今朝食完早餐 (煙三文魚，咖啡，雞蛋，煙肉，火腿... ，其實日日都係!)，就出發漫步海德堡。十一月早上天氣得五至六度，天陰陰，七八點鐘條街都冇咩人，只見到一團團日本同中國遊客。第一站先到城堡 (Schloss Heidelberg) 參觀，雖然位處山腰，但行上去十幾分鐘就到，慢慢行幾舒服。入城堡要入場費，如果英文ok 的話 (好似得英文同德文)，入到城堡仲好報個tour ，到城堡內部參觀 (約三十分鐘)。

完左tour，個天清返，又有陽光，部相機又活躍起嚟。落山後沿住條河就揾到條橋Karl-Theodor-Bracke (當地同事叫old bridge)。過橋之後就見到一條小徑上山 - Philosophers' Walk (German:Philosophenweg)，真係一覽海德堡全景好地方，河，橋，敎堂，城堡，盡收眼底。之前諗住下晝陽光會照向城堡，但人算不如天算，正午後陽光銳減，個天又陰起來。不過正值秋季，一路上盡顯秋色，我拿起隨身的保温杯，一邊歎咖啡，一邊欣賞呢個中世紀城市，心想: 唔怪得總公司要喺呢度啦!!

講到食，先講下d 水，酒店日日都有sparkling water 供應，唔太慣，當然佢地會幫你換，都ok。食物方面，呢十日食左豬手，牛扖，羊架，炸豬扖，鴨肉，肉腸．．．　本身間酒店食物就覺得一般，唔明點解有個米芝蓮logos。行遠少少間Hotel Zum Ritter (http://www.ritter-heidelberg.de/en/)就真要推介一下，個炆鴨同羊架真係唔錯。返正呢度食一餐一般都要廿幾euro，揾間好食嘅實際好多。

最後一日十一月廿四日，個聖誕市集終於開始，今晚個廣場勁熱鬧，好似成間大學d學生一齊出晒嚟玩咁，有熱(薑)酒飲，有肉腸食，有pizza，又有好多聖誕玩意賣，如果落埋雪就very good。

Useful Links in Heidelberg, Germany

Map:

http://www.heidelberg-marketing.de/content/e7185/
e7636/e13875/file/Highlights2011_englisch_eng.pdf 

(English)

Blogs: 
http://blog.yahoo.com/_6XBS4V5TLAGBJKDUT6W
QMVHBOQ/articles/44717 (2011)

http://blog.xuite.net/b766030/blog/51953904 (2011)
http://wenhsinlin.blogspot.com/2010/02/
heidelberg.html (2009)

http://blog.xuite.net/cassie1029/cassie/18735879 (2008)

http://blog.yam.com/eric0212/article/15709589  (2008)

Youtube:

http://youtu.be/2HJKuaY0Uss

Others:

http://www.heidelberg-marketing.de/content/index_eng.html

http://www.e-heidelberg.com/attractions/

http://www.visit-heidelberg.com/tours/castle.htm
http://www.germanplaces.com/germany/heidelberg.html

十一月上旬 - 九曲十三彎 Cameron Highland, Malaysia

有朋自遠方來，又難得星球有三日假期(Hari Raya Haji)，就跟這位老死去馬來西亞玩幾日，目的地係 Cameron Highland (金馬倫高原) http://www.cameronhighlands.com。

由新加坡去金馬倫高原，可以坐旅遊巴，夜晚上車，第二朝早上到，既慳時間又慳酒店費。可惜我呢位老友係旅遊巴瞓唔到覺，我哋只好改搭飛機先到Kuala Lumpur。飛Ipoh 會近ｄ，可惜航班少又就唔到時間。飛去KL 就有Jestar，AirAsia，Malaysia Airline, Firefly，今次最平係AirAsia，零票價，只需要機場稅同燃油費。我哋今次坐jetstar，因為零票價巳經賣晒。坐一個鐘機，(實際只要十幾二十分鐘)，再坐多廿幾分鐘KL Express 就到KLCC。因為我個老友分分秒秒iphone不離手，我哋就揾左個位有叉電，發現成架KL Express 只有一個power supply。佢緊係嗱嗱啉狂叉。KL Express 有family ticket : http://www.kliaekspres.com/erlsb/Promotions/FriendsFamilyFare/tabid/199/Default.aspx

由KL去 Cameron 要坐四個幾鐘車，去Puda Raya個車站就會揾到好多旅遊巴士公司賣車票。我貪方便book左車站對面間Citinhotel (http://www.citinhotels.com)住一晚，間酒店算幾平，配套當然張貨就價，房間瀰漫K房味之餘，張床仲感受到一個個彈弓既硬度。呢晚我哋冇一個瞓得好，羊太又唔識得較細ｄ個冷氣，結果好似僵屍咁瞓左一晚，第二朝八點就 checkout閃人。

由ＫＬ去酒店嗰程車經酒店上網訂。我哋一早上左counter攞票，個售票員十下十下就寫左個座位同時間，車位同車牌俾我哋。點知上車坐左冇耐就俾工作人員趕落車，話冇我哋記錄woo。我緊係火滾啦，打去酒店問，佢哋又pass左我去個agent度。仲衰，跟本聽唔明佢d英文，雞同鴨講左一輪，羊太接力，最後agent話俾我地搭下午班車。我哋唔收貨，繼續噪左佢成個鐘，最後agent 屈服，我哋自己搭的士去cameroon，agent俾錢 – 成四佰蚊馬幣 ! 嗰的士司機勁開心!! 羊太好野!!!

十一點由KL出發，四點幾到酒店，咁大個仔都未坐過咁耐的士。三個鐘highway，個幾鐘山路，條上山路起碼有三百幾個彎，同返大陸去女兒國條路有得比。加上個天開始落大雨，我真係服左d司機。

酒店叫Equatorial (http://www.citinhotels.com/reserve.php)，我哋三個人book左一間2-room apartment一晚，超大，張床好好多。個天仲不停落緊雨，我哋只好係酒店附近d市場逛逛，好多蔬果賣，又大又新鮮。羊太貪食，買左杯栗米粒食，好味。我就買左有成塊臉咁大既蝦片食。雨越落越大，天氣又凍，最後三個人去左打邊爐。點左個鴛鴦湯底(冬蔭加清湯)，另加三杯薑茶，三個人食到又熱又飽，埋單都只係七十幾馬幣，好平。間餐館仲掛左蔡瀾同周中師傅幫襯張相。

第二朝食完個免費早餐就出發。我哋報左個半天團，羊太話尋日落雨，就唔好去行森林，驚泥濘整污糟白色波鞋woo，咁就要同大大花緣慳一面。呢個半天團唔貴(三十幾馬幣)，但唔包入場費(每個場三四蚊)。第一站去左玫瑰園，裏面有叫blue butterfly同lady’s shoe既花，幾特别。第二站去左士多啤利園，只係見到一排排花盆種住士多啤利，其他area就冇開，又冇得摘黎食，唔太過癮。不過我就鼠左入去賣士多啤利醬既鋪頭，發現入邊有間房放左一盆盆士多啤利，又紅又大粒。第三站去茶園同BOH個廠睇下呢度點整茶葉，沿路個導旅俾我哋落車係checkpoint影相，個view 都唔錯，見到好多茶樹一堆堆成幾個山頭都係，最衰天氣唔好又唔知路，影唔到日出霧起個shot。個茶廠唔係好大，不過以前返大陸旅行都被人帶去品茗，都唔知茶葉點整，我相信呢度製茶葉同袓國一定有唔同，下次返去一定揾機會對比一下。我哋係度買左d茶葉同飲左奶茶，茶味幾香，但好似冇香港d茶餐廳咁滑，情意結啩。最後去埋蝴蝶園同蜜蜂園就回程，坐大巴(RM35 - QISTNA EXPRESS SDN BHD)返KL再搭機返星球。

Useful Links:
http://youtu.be/Nr1yoe_UGDQ
http://youtu.be/9FBASioIrEA
http://www.go2eu.com/bbs/viewthread.php?tid=386540

Maps
http://www.cameronhighland.net/map.htm
http://www.cameron.com.my/cameron-maps.html

Swiss Travel Trips & Links

General:

http://www.myswitzerland.com

Railway:
http://www.sbb.ch/en/home.html

Weather:
http://www.meteoswiss.admin.ch/web/en.html

SwissPass:
http://www.swisstravelsystem.ch


Regional Travel Guides:
http://www.interlaken.ch/index.php?id=53&L=3
http://www.grindelwald.travel/en/welcome.cfm
http://www.jungfrau.ch/en/tourism/
http://www.bern.ch/weiche_en
http://www.lamaisondugruyere.ch
http://www.chateau-gruyeres.ch
http://www.montreux-vevey.com/en/
http://www.zermatt.ch
http://www.gornergratbahn.ch
http://www.lugano-tourism.ch
http://www.swissminiatur.ch
http://www.bellinzonaturismo.ch
http://www.luzern.com/en/
http://www.pilatus.ch/
http://www.zuerich.com/en/Buchen.html
http://www.geneve-tourisme.ch
http://www.schaffhauserland.ch
http://www.st.gallen-bodensee.ch
http://www.stmoritz.ch/
http://www.titlis.ch

Others:
http://www.velopass.ch/


Blogs (Chinese):
http://www.myswiss.jp/trips/lbh/mc_tm_01_lbh.swf
http://hoamy123.pixnet.net/blog/post/28469318
http://bobocookie.mysinablog.com/index.php?op=ViewArticle&articleId=2947642
http://cho86521523.pixnet.net/blog/post/65987831
http://hk.myblog.yahoo.com/jw!TQ820OWWHwV93HQCndc3poKmhrWv8g--/article?mid=466&fid=-1&action=next
http://freejumper-jim.blogspot.com/2011/04/2010-2010-trip-of-switzerland.html
http://chiltonsfather.blogspot.com/2011/04/2011_9783.html
http://city.udn.com/v1/blog/article/article.jsp?uid=debby927&f_ART_ID=203805

Youtube:
容祖兒 現代塵世美 http://youtu.be/7p65JKLHO8I

Updated 2011 Oct

To be added...

瑞士自由行 Day 13 & Day 14 – 煙火Zurich

經過十二日旅程，我哋巳經環繞左瑞士一個大圈，返到Zurich，心情有少少唔同 – 因為旅程快接近尾聲。當然，Zurich咁出名，我哋留佢做壓軸。搭火車由Luzern到 Zurich，一出火車站唔使五分鐘就到Central Plaza Hotel (www.central.ch)，位置好好，對面又有COOP，間房見到條Limmat河，雖然層數唔高，但都望到遠處既教堂。

Check in 完就到COOP 買野食 ，(個千層麵幾好食，呢個係我回程時特登要再買上機食，另外一袋當然係燒雞)，然後就出發 Schaffhausen，火車上見到Rhienfall，冇想像中咁壯觀，所以都冇落車睇。去到Schaffhausen，我哋先到tourist centre 攞個city map 研究下checkpoints (http://www.schaffhauserland.ch/en/service/prospects: citymap)。呢度有大敎堂，Munot城堡同其具有歷史價值既建築 – 露台既豪華裝飾同外牆既壁畫。大敎堂呢幾日好似有紅酒節之類活動，見到好多酒商在準備攤位，d酒樽賣相好靚。城堡頂風景一流，仲放左一支大炮，咁啱支大炮有隻羊標誌 ，雕工細緻，勁鐘意!! 旁邊仲養左一大班梅花鹿，不過就唔知乜典故 !

旁晚返到酒店用膳 - COOP 燒雞，今日終於買到啦，好食過MIGROS好多，仲買左支Rhäzünser Plus 黎送隻燒雞食，呢個牌子既蘋果味好好飲。食下食下，聽到好多警車聲，開頭都唔著意，之後落去散步時個天突然間砰砰聲，原來有幾處地方一齊燒煙花，呢個特備節目都幾出人意表。

返到酒店去左樓下間bar食甜品，我點左個lemon tiramisu，超甜，甜到頂唔順個種，返房要飲返支 Rhäzünser Plus 漱口。

第二朝一早起身，個天好陰，唯有留係房度靜靜地等羊太起身。佢超好瞓，當然張圓型床既功勞。瞓醒巳經十點幾，煮左通心粉配巴拿馬火腿早餐食，然後就check out。旅程最後一日，我哋安排左參觀敎堂既節目。敎堂最特別係裡面d 玻璃畫，透過引入室外光源令一幅幅 壁畫  色彩繽紛，工匠既技術真高超，只可惜室內嚴禁影相。

最後一個下午，最後一個節目就係shopping，當然只係window shopping。名店其實冇太大興趣，返而鐘情賣民族紀念品既 Heimatwerk (http://www.heimatwerk.ch) 。我真係好鐘意架木火車，不過太貴，最後都忍著手，只可惜剩返既銀彈全都貢獻左俾Sprüngli – 羊太話個truffes cake一定要買。

瑞士自由行 Day 12 – 登 Museggmauer 一覽 Luzern 的紅色小屋

今朝係Maienfeld悠悠閒閒左一個上晝，酒店既早餐又係煙肉火腿芝士同飽飽，選擇唔多，味道一般。收拾好行裝就出發去Luzern ，臨走見到酒店對面有間sovernior shop，好多野賣，可惜個店主剛閂門走人，冇得入去睇。

係Luzern 住 Hotel Alpha (www.hotelalpha.ch)，火車站一條大直路到尾行十幾分鐘就到，不過拖住個行李箱咁行都幾攞命 – 個箱太大。呢個時候羊太巳經肚餓到冇晒心機，check in 完就嗱嗱聲出去揾食，但係成條街都冇乜野食吸引，一直行到碼頭，見到間carteen 都幾人幫襯，就點左炆鴨飯，勁鹹，羊太當然唔滿意，最後係左旁邊間雪糕舖買左個大chocolate cone ，又香又軟，同係Lucanro食嗰隻又好唔同，質感實好多，羊太食完終於有開心返。

碼頭好熱鬧，一批批遊客係一架架大郵艇上上落落，無他，因為個湖真係幾靚，不過今日無遊山玩水，羊太話今次要跟住個地圖行下check points: 由敎堂，獅子紀念碑一直行到Museggmauer城牆頂，再行返落Kapellbrucke木橋 (詳細見http://www.luzern.com/en/brochures : City Guide) 。呢段路一d都唔易行，我指係城牆個一段，又上又落，不過真係值得，一登城樓就見到 Luzern 全景，山下一間間紅色小屋，都好似被遠處既雪山同湖水圍住，時間又到左magic hour，相機個快門又要加班，真係影到唔捨得走。呢度仲有一個小塗鴉 : 中大英文系，全港最巴閉 !!! 

行到鬼死咁攰，本想到河邊揾晚餐食，呢度成個酒吧區，勁多人，但我哋發現沿住條河都有好多fruit fly ，最後行返入內街間Grendel 19 ( http://www.grendel19.ch/) 點左 Rindsfilet 同 Kalbsleber Venez，好好味，不過食左成92 CHF，而家睇返都幾肉赤。

瑞士自由行 Day 11 – Heidi村尋找海蒂

尋日上城堡唔夠喉，今朝一起身就自己再上去Castle Montebello。唔知係唔係錯過左班巴士，等左好耐都唔見有，只好自己揾路上山。一直行到敎堂，先發現牆邊有個路牌指住上山條路，就一級級行上去。條路好窄，梯級又高，我行左十幾分鐘巳覺氣喘，好彩行左約十幾分鐘就巳經見到座城堡。我覺得Castle Montebello 係呢個城堡群最有觀賞價值的，有城牆，吊橋，旁邊又有個小小葡萄田，上到城樓可以影到大城堡，今朝又冇乜人，可以任影。

影完返酒店接羊太，然後就搭巴士由Bellinzona 到 Chur，呢架雙層巴士都幾快，一路都行高速，仲舒服過坐火車 (都快過火車)。坐左四五個鐘度，下畫兩點幾到Chur，超肚餓，去附近間MIGROS carteen食左個快餐，麻麻地，再去超市買多隻燒鷄同通心粉先走。

其實Chur只係中途站，我同羊太逛完超市就搭火車去Maienfeld – 卡通片« 飄零燕 » 既寫作場景，不消五分鐘就到，先去酒店check in，今次住火車站附近既 Swiss Heidi Hotel (www.hotelalpha.ch)，冇乜等別，本想住山頂個間 (http://www.heidi-hotel.at/) ，不過book 唔到，都ok啦，唔使搬行李咁辛苦。

休息完就出發去揾ｈｅｉｄｉ蹤跡。今次剩係帶５０ｍｍ鏡頭，貪佢夠輕便。條村唔多人，好寧靜，都有幾間b&b出租，近火車站，可能仲平過酒店。本旅遊書有指出幾個« 飄零燕 » 既實景，我哋掛住揾路，都冇太留意，不過就見到幾多同凱迪有關既壁畫，同好多名車。時間下午四五點，太陽仲有ｄ猛，跟羊太慢慢沿住一條大直路上山，一路到有葡萄田同酒窖，又有好大片草地，被太陽照得金光閃閃，勾起唔少 « 飄零燕 »ｄ片段　－　凱迪係草坡度跑來跑去！我哋入左其中一個葡萄田影相影左一陣，都冇人理過我哋。

終於見到山頂間酒店，呢度見返多少少遊客同一架架旅遊巴士，不過仲要行多一段斜路先去到後山個博物館同紀念店。紀念店外邊有個牧羊場，養左十隻左右既山羊。呢班羊咩都好識食，一聞到有人買飼料，就會好瘋狂咁跳出個圍欄跟實d 飼料同遊客，大個幾隻仲倡狂到撲上個人度，好多細路仔都嚇到走夾唔抖。點算  ! 呢個時候就有位老人家出來，一聲口哨，一隻隻山羊都迅速地跳返入圍欄，當真咄咄稱奇，好有彼德feel。

時間六點多，夕陽滲著微風，羊太好enjoy，影左好多相，仲係紀念店買左一套木製彼德，凱迪同約瑟。Maienfeld的風景冇其他著名景區咁壯觀，但寧靜小村搭上翠綠山丘，加埋陪我同羊太長大既 « 飄零燕 »，心情舒服之如都重拾少少童真。玩左咁多日，今日係最簡單的。

瑞士自由行 Day 10 – 穿梭 Lugano 小人國

細細個就聽過有個小人國，但一直都唔知係邊。今次plan旅行時無意發現原來個小人國就係瑞士 (http://www.swissminiatur.ch)，所以特别過黎睇睇。Lugano離Bellinzona 唔遠，我哋好優閒咁食完早餐(火腿芝士牛角飽)先出發，用餐時見到好多型男索女經過返大學，呢個view真係別具風格。

入到小人國就見到好多精細既模型，呢間野真係好有心思，將瑞士各種各樣既景點鉅細無遺咁表達出來，有d景點我地好快就認得，有d就可能之前去左既地方miss左或者冇去到。我最鐘意係Dome of Milan (Italy)，成個人都可以穿入去，裡面仲佈置到好華麗，自己就好似大到要逼爆個教堂。當個人出返來，見到一架架小火車駛來駛去，感覺真係好鬼盞。

兩個大人係小人國玩左好耐，影到個太陽高掛，大汗疊細汗先走。回程時去左Lugano City 遊覽，一落車，見到有架纜車等緊人就開，我哋就馬上買票衝上車，查實我連架車駛去度都唔知，只係見到架纜車不停落斜，架車一停所有人就散晒，原來架車只係載人上落斜坡，條斜路話長唔長，但都幾斜，同澳門上大三巴牌坊差冇幾。今日呢度好旺場，呢個city 同之前既又好唔同，本書話意大利風喎，意大利我就仲未去過，不過真係feel到呢度d人著得入型入格。

行到去湖邊，湖水好藍，一架架遊艇排晒係岸邊，間唔中都有幾隻天鵝曬下日光浴，真寫意。不過今日都好曬，叫我曬日光浴就唔太 enjoy，有時間都可以遊下船河。天口熱，揾左間賣雪榚店，好軟好好味，間店名就唔記得左，個舖位近車站，其實附近只此一家，其他都係見慣見熟既名店。附近仲有間賣巴拿馬火腿既舖頭，一隻隻大豬腳掛晒出黎，真大開眼界。

行到三四點，就返Bellinzona睇城堡 (Castelgrande, Castle Montebello, castle Sasso Corbaro)。Sasso Corbaro 係三個城堡入面最高最細嗰個，要上去可以到火車站對面個巴士站搭4號巴士。到Artore落車後要上一大段先上到去，最後一段石頭路，又窄又高又多四腳爬爬，羊太行到呱呱叫。上到山頂除左可以見到山下另外兩個城堡，仲可以一覽整個Bellinzona。不過呢個城堡真係好細，玩左一陣我哋就去山腰個Castle Montebello，搭一個站車，呢個站落車雖然要行一段山路先可以到Castle Montebello (2-3分鐘)，但可以用Bellinzona做背景影個城堡，太陽落山影真時間啱啱好。可惜六點幾個城堡就關門，要入城只好明天請早。

等巴士落山，羊太發現巴士站附近成遍地下鋪滿有尖刺既果實，佢走左過去玩下踩下，d果實一個個爆開左，哈哈，羊太重大咁發現左d果實入面原來係栗子，又幾好彩，撞啱栗子當做。 佢覺得好好玩，就執左一大袋返酒店慢慢逐粒爆。

瑞士自由行 Day 9 – Leisee不能藏二羊

今日一早起身行出露台就見到金色的陽光照係Matterhorn 上面，就嗱嗱啉換衫同叫醒羊太準備去Leisee 。太好唔願起身，因為尋日太攰，佢只係做左一d最最基本既梳洗工作，就陪我出左門口。去Leisee個車站係Zermatt 另一邊，要沿著纜車站旁的小徑一直走都河邊就會見到，今早太趕，忘了帶Swiss Pass，又唔想返轉頭攞，唯有買原價票，足足貴左一倍。纜車未開，我同羊太就係等左十幾分鐘，呢十幾分鐘好漫長，羊太成個渴睡樣放左係塊臉度勁想瞓，我勁唔好意思囉。

纜車終於開，成架車得個幾丁友，再加上入閘後穿個一條冷清清既山洞，個心都有少少寒，怕上到好個view 令人失望。唔使一陣就到左Leisee站，一出閘就見到路牌指路，開頭以為要行一大段track先會揾到，點知個SEE就係站口附近，落一段小斜坡，大概五分鐘到就見到個湖啦，同之前d湖一樣，都係好細。

今朝天氣都幾寒，但個天就好藍，又冇雲，我當然影左唔少相，羊太仲未醒過來，唔想出鏡，剛好太陽係身後照過來，我就將我哋既影子連同雪山既倒影一齊拍下留念。

太陽照住個湖，湖水就開始蒸起霧氣來，我技術唔夠，影唔個d煙升起個種感覺，只好企定定睇下感受下。睇睇下，忽然聽到 ‘砰’ ‘砰’聲，揾左一陣聲音既來源，發現左湖對面有兩隻羊咩咩打緊交，不停用自己個頭同對手互撞，我同羊太都睇到呆左，羊太終於攞左部DC出來拍video。佢地打左好耐，到我哋走都仲打緊。

因為要趕火車同check out，我哋好快就返酒店，好好彩早餐時間仲未完，我哋緊係食得唔好嘥，侍應仲話我哋係最後一對客人，叫我哋食多d woo.

呢程火車好耐，由Zermatt 到Bellinzona 要成大半日，到Bellinzona check in 時好似四五點啦。因為今日係星期日，成個city 都冇人，真係鬼影都冇一隻，因為係Zermatt勞動左兩日，我哋今次揾左間係火車站附近既酒店 (Hotel Internazionale) 住，方便同舒服一點，之前都有揾個呢區既民宿，但就唔就腳，而且呢間酒店又平個Lugano。呢間酒店有個天窗，夜晚可以睇星星，都幾多嫁。 大家上網可能會揾到ricky民宿就係Bellinzona，有意可上網search下。

今日舟車勞動，只係去左市中心個大城堡睇下個架步，相機都冇帶，跟住就買餸返房是晚飯。

瑞士自由行 Day 8 – 羊咩咩 Matterhorn 氹氹轉

今日起身個天都唔太清，但上網見到Gornergrat 既天色超好，馬上收拾行裝，連旅館早餐都唔食，買左個牛角飽就急急腳去都纜車站買票上山，一路個天都好藍，少少雲都冇，Matterhorn當然就赤裸裸咁曝露係眼前。Matterhorn 個山都幾高大，同其他山峰不太相連，有d “岳”不群既感覺。

到Gornergrat站下車，第一步巳經企唔穏，因為地下結霜，好滑，見到好多人都中招，我同羊太站穏陣腳後，第二個感覺係凍到麻痺，雖然天晴，但勁大風，原來温度只有 -7 度，比尋日足足低左十一度，比平日新加坡低左三十幾度，加左件大褸都好似冇咩用，隻手指唔聽使，唯有用意志力將眼前美景用快門留下來。熱身完畢，揾左隻大大隻聖班納狗影相留念。呢隻聖班納狗都幾歎，平時冇人 (班火車未到) 個主人就會帶佢入室內取暖，到下班火車到站佢又會出返來擺好post 等客，被人摸下。影完落山就可以到相舖攞相，~ 10 CHF 一張。

處身觀景台，被雪山，冰川，雲海包圍著，感覺震憾，不過個天都真係變幻莫測，突然間大風把雲霧吹了過來，我哋馬上入carteen 食早餐歎咖啡，好彩早走早著，不消十幾分鐘雲霧就蓋得室外白茫茫一片，有好多遲來的旅客都被困於濃霧之中。

等左好耐個天終於清返，中午就搭纜車到 Rotenboden 站去 Riffelsee ，呢度係影 Matterhorn “postcard” 其中一個地方，不過今日都幾蝦人，Matterhorn個尖尖總有一舊雲唔捨得走，個湖面又時時起浪，少d耐性都唔得，不過今日呢度有好多遊客陪我一齊等，個view又咁靚，等一兩個鐘 ok 啦。 好彩係太陽高掛，冇山頂咁寒。

影完都好似三點幾，就去下個站 Riffelberg 點左小食醫下個肚，離間餐廳不遠有一大堆羊群，呢堆羊黑頭白身，我同羊太咁耐都未見過咁大堆羊，緊係走上前玩下。正當羊太同一隻大羊影緊相之時，隻羊大吼一聲，山坡上隨即有三隻小羊仔向住羊太直奔過來，羊太嚇到傻左。可能我地阻住佢地食草，隻大羊羊就一聲號令叫齊所有成員轉地頭。

班羊走得真係快，我哋跟跟下都跟唔到。玩到興起，羊太又有鬼主意，“徒步下山”，我不甘示弱，當然奉陪啦！其實段山路唔太難行，只係背上既相機裝備好重唔輕便。行下行下，見到一黑影跑左開去，呢個黑影好快，一定唔係羊，企定定一睇，原來係土撥鼠，呢隻好似好怕人，一陣就唔見左，之後我哋落山都落足眼力睇下好唔好彩揾多隻。

一路上都係羊太帶路，行下行下，發覺我哋巳經偏離路線，羊太話被指示牌點錯方向，時間巳經六點幾，大家都驚玩大左，個天一黑就大件事，真係慌不擇路，只認住 Zermatt 方向就闖落山，最後見到一條小溪，沿著小溪揾路返旅館，返到時巳經八點幾，個天都差唔多黑晒。

又累又餓，Coop 都閂左門，唯有揾間餐廳用膳。今晚去左一間叫 whymper-stube　（www.whymper-stube.ch）點左哈密瓜巴拿馬火腿同芝士火鍋食，前者好食，後者就超醎，只係配麵包，不過好多人幫襯，見到d洋人個個都一人一煱，食得好滋味咁，不過我哋兩個人一鍋都食唔晒。

瑞士自由行 Day 7 – Matterhorn 上的急凍鏡頭

尋晚狂風大雨，今朝早都係天陰陰咁，不過都係決定上 Matterhorn睇睇，纜車站就係火車站旁， 用Swiss pass 買左來回票就急急闖峰 (http://www.gornergratbahn.ch)。今次上山坐係左手邊睇風景，都幾開揚，但係成架車d窗都唔開得，影相就唔過癮。不過上到Gornergrat站一落車，寒風刺骨，手腳都係咁震，事關一開始先入為主，以為山頂會好似少女峰一樣咁曬咁熱，於是放心輕裝上陣，點知原來係兩個世界，太陽伯伯是日休息，不一會個天仲落起雨來，雨點打落個身度又凍又痛，羊咩咩同羊太都頂唔順，唯有急急腳入souvenir shop 避避。

Souvenir shop冇乜特別，大部份紀念品山下都有得賣，最後見到一支白酒，酒身為磨砂設計，印有瑞士經典圖案，因為好特別，諗都唔諗就買左第一份紀念品。最尾發現山下竟然揾唔到佢既踪影，好彩一早買左。

等左好耐個天都唔見有起色，決定下山，跟三角朱古力緣慳一面。下山時天氣好返少少，就係Findelbach站落車行下山，最後係河邊吃午餐 – 係coop買既沙律，都幾好味，係呢度食沙律，感覺超大自然。

呢度附近有條村幾靚，有好多都會出租，不過就唔太就腳。可惜支24-105 經唔起山頂既惡劣天氣，壞左!!! (error 1 – communication error) ，影唔到相。不過信不信由你，衰運真係一不離二，二不離三，回程時羊太竟然將成副相機撞左落地，個地下鋪有鐵支，防滑唔防撞，支18-200 跟350D 咁撞發，CPL filter 爆左!! 咁激，搞到成日都冇咩心機。

今晚羊太用心泡製左熱辣辣蕃茄牛肉丸湯，心情先好返少少。

瑞士自由行 Day 6 - Vevey-Montreux 馬路狂奔

今日既節目算係今個行程中幾期待的，因可一睹歐洲的梯田跟葡萄園。一大清早起床，靜靜雞換左衫褲，背住羊太去探望晨曦下的葡萄園同日內瓦湖，湖上雲霧未散，幾有詩意，影左幾張相，決定入村睇睇，條村跟之前係Grindelwald感覺好唔同，好有法國feel，我話個種法國feel就好似細個時睇三劍俠卡通片個佈景咁。

等左好耐個太陽都未出，就回巢睇下羊太起身未，呢間民宿既裝修同五星級酒店有得比，我直覺話我知羊太仲未起身，碰啱屋主買完早餐回來，就同佢一齊去露台飲咖啡。飲下飲下，陽光出來了，把整片葡萄園跟Lausanne照耀起來，影下影下，羊太終於起身了。主人家準備好多早餐，有好味牛角飽，又有各種芝士食，有自製果醬，超飽。

拜完五臟廟，主人家話車我地周圍玩，我當然樂意之致，佢地車坐我地去好多checkpoints影相，呢個時候陽光照到個梯田綠悠悠的，個天又好藍，我部相機個快門機響個不停，之後佢仲帶我哋去酒害同酒廠參觀，呢度酒廠唔大，大多係家庭式經營，冇佢帶路真係去唔到咁特色既地方，最後去埋葡萄園影葡萄。可惜只係計劃留呢度一日，玩到咁上下，佢就送我哋去到火車站，出發去Vevey。

去Vevey 的節目就係單車自駕遊，先把行李放係Vevey火車站既儲物櫃，(大行李一早就係Grindelwald托運去下一個目的地)，就去揾遊客中心租一天的單車票 - Velopass，遊客中心同火車站有一段距離，揾左一陣先揾到 (http://www.montreuxriviera.com/en/Brochures )。買左票，研究左個地圖一陣，決定由Vevey直闖到Montreux。羊太呢個決定太衝動了，太陽伯伯今日好強壯，一路上我件衫濕完又乾，乾完又濕，拼命左大半個鐘到左Montreux既Chateau de Chillon，呢個城堡係岸邊，驟眼睇好似浮左係水，website 既黃昏相好靚，值得check下。本身好想入去睇下，可惜唔知點解羊太駕單車鎖唔到，惟有係附近影左陣相就回程，沿著湖邊踏單車幾好玩，個湖閃閃發光咁，一路上又有唔同既三點式養眼，不過中間有一段單車徑係馬路隔離，要量力而為，最後我返到Vevey成對腳都好似唔屬於自己咁，不過羊太就大叫過癮。 體力透支，問了火車時間後就馬上到下個目的地 – Zermatt 。

坐左三個鐘到Zermatt，竟然刮風落大雨，大家又累又餓，嗱嗱聲攞行李，揾酒店，check in，就揾地方醫肚，最後去左呢間 Swiss Chalet (http://www.swiss-chalet-zermatt.ch)點左個Fondue Swiss Chale食，加埋支紅酒 (Heida)，係狂風暴雨下叉住牛肉，點紅酒火鍋，摸酒杯底，正 ! !

間酒店就一般 - Stockhorn (www.grill-stockhorn.ch)，不過同價錢成正比，另一個好處係有私人洗手間同浴室，細就細左，不過都算乾淨。間房係二樓，仲有個露台，不過係同其他房連埋一齊，行出去要走去人地間房外先見到個Matterhorn，感覺怪怪。呢度要自己搬行李，今次有大行李跟身，真係挑戰自己既臂力。

瑞士自由行 Day 5 - 太陽下的 Gruyères 芝士

今日離開Grindelwald呢個充滿大自然氣息的山區，一大清早check完車程同checkout就出發向另一個地方 - Grandvaux。先坐火車加兩程巴士到Gruyères ，約三個幾鐘，Gruyères有一間芝士廠(http://www.lamaisondugruyere.ch) 同一個城堡 (http://www.chateau-gruyeres.ch)可以參觀。要睇芝士製造過程要先check下時間表，我地見仲未到下一場，就問下counter可唔好以放低行李，佢地好好人，將我地d行李鎖係員工室，然後我同羊太就係呢度間餐廳食午餐，話時話，前幾日都係羊太煮飯食，將大部份即食麵杯麵罐頭都掃清光，今次係第一次係瑞士點菜食飯，都有少少驚大出血。算吧啦，旅行就無謂慳得太過份。點了兩個特色菜，其中一個係火腿拼盆，配有唔同種類的芝士塊，羊太一路食煙肉一路話好香好好食。

整芝士分幾個步驟，我地有Swiss pass，入場免費，中間等嘅時間就出去睇sovenirs。今日竟然撞到香港人，原來有團康泰到左，不過佢地參觀左一陣就走，我同羊太都忽發其想 : 有冇順風車坐，不過我地最後當然睇晒成個芝士製造過程先走啦，這就是自由行同跟團嘅分別。

睇完整芝士我地就搵路上山頂個城堡，不過好似錯過左條路，唯有係山下逛逛。今日天氣好好，下午好熱，行左一大段路終於見到個城堡，商量左一陣好唔好硬闖上山，不過最後屈服係太陽伯伯手下，返火車站。

等火車時羊太提議攞剛才芝士廠送嘅芝士試下，一攞出來先發現個幾塊芝士溶到變左做芝士水，可以想象到有幾熱。笑左一大餐，就試下攞去換，得左。哈哈，今次我地一次過食晒六塊芝士，都幾鹹，好彩買左一大支可樂旁身。

繼續火車行程，呢次架火車又焗又熱，轉車後坐左好冇幾耐終於到另一間民宿。呢間民宿位置係山腰，要攞住行李搵都幾唔容易，其實個屋主一早話可以call佢車我地，不過我同羊太都想試下自己揾。最後當然成功到步，上左房就發現個view好開揚，同個website一模一樣，左手邊見到一大片葡萄園，右手邊係Lausanne，前面係一個小村莊，遠少少就係日內瓦湖(Lake Leman)，對岸就係法國，呢幾個view一次過搬係眼前，加上山上的滲著微風，個感覺真係難以形容。

間民宿叫Villa Lavaux (http://www.villalavaux.ch)，主人家係一對老夫老婦，佢地唔係本地人，係美國住過，英語好好，唔使擔心溝通問題。呢對夫婦好熱情，我地settle down後就開左支當地既白酒俾我同羊太飲，飲酒我唔在行，不過氛香撲鼻，名叫 Chasselas，邊年就忘了。我地係露台摸杯底，傾左好耐閒計。屋主就車左我地去湖邊一間餐廳 (http://www.hotelaumajordavel.ch)食晚餐，仲叫人安排一位識英文的侍應招呼我地，真好人。

去到餐廳一坐低，羊太就九秒九咁彈起左，直衝去湖邊，跟住好多食客都走出去，原來湖邊出現左兩條半圓型的彩虹，我個位被窗框擋住，最後都走了出去。外邊毛毛細雨，看著兩條大彩虹，肚餓都忘了。跟羊太影下相，浪漫一下。

今晚我點了一碟地道炸魚 Filet De Perche。好好食，今日玩得真開心。

瑞士自由行 Day 4 - 回到大城 Bern

今日唔再行山，坐火車到Bern行下。Bern 係瑞士首都，舊城區不大，到步可以先到tourist information 攞張地圖 (http://mhs.gadmin.ch/item_files/48213.pdf) 揾噴泉同其他checkpoints。我本身對行city冇太大興趣，不過就俾噴泉，有軌巴士，同地下店吸引住，地下店扇大門斜斜地”埋”左係地下，間舖頭唔開都唔知佢存在。羊太就被個市集迷住左，今日個市集有好多奇奇怪怪生果賣，我地最後買左盒士多啤梨，好新鮮，好甜，口感跟美國日本個款好唔同。Bern有個鐘樓每小時正都有表演，好多旅客都企定定睇。我地睇中午十二點個場，因為個鐘會敲十二下先停，不過千祈唔好以為會好耐。D公仔轉轉下都幾得意，不過就唔係好特別，個太陽伯伯仲係正頭頂照住。

我一心想影Bern個全景，就去左Bären Park後面左手邊個Rosen-garten，可惜陽光角度差之如，又影唔到條河，因為被一排排樹遮住。最後羊太建議行到Bären Park後面(Rosen-garten相反方向)個小山丘試下，哈哈，羊太有時都幾醒，個view同光線好好多，終於影到全景。藍色的天，紅色的屋頂，同綠色的河，好似細細個睇卡通片的畫面，最可惜是個教堂維修緊，個塔頂搭在棚架……

回程本想去Interlaken 遊湖，最衰之前冇做好功課。Interlaken 有兩個湖，又係一個藍色 (Thuner-see) 一個綠色(Brinzer-see)。遊藍色個湖應先在之Bern 同Interlaken west的中途站下車再坐船回Interlaken，不用走回頭路。真stupid ，我坐左架火車一直到Interlaken OST 下車，只能遊綠Brinzer-see，之前又冇check timetable，結果剛miss左最後一班船。點解miss左? 只因貪食一下火車就去左coop買燒雞脾。冇得遊湖，又想租單車玩下，可惜又找唔到租單車的地方，最後只係沿河邊散下步，其實都好自在，六點鐘個天冇咁熱，又有風，好舒服，早知買多晒成隻燒雞慢慢歎。

瑞士自由行 Day 3 - 尋找阿爾卑斯"水" Bachalp-see

第三日歎完早餐就出發去First (http://www.jungfrau.ch/uploads/media/01_First_Bachalpsee_First_01.pdf)，今次要到Grindelwald 另一邊(村尾)的車站坐吊車，因為有5 days Pass，不用再買票。架吊車好快，到左沿路的幾個站，架吊車會自動開門，小心落錯車，一直到終點站就是了。左手邊同右手邊風景差唔多，而且我兩公婆包左架車廂，鐘意坐邊就邊。查實係人少，唔使好似昂平360同人share。

上到山頂最好準備一下，例如去個洗手間，出發後行一個小時山到Bachalp-see，(因為我地又行又停影相) 。呢段山路唔難行，開始時有少少上山路，跟住一大段平路，可以話三歲到八十歲都行得，不個全係碎石路。個 ”see”由兩個細湖組成，一藍一綠，幾特別，話就話揹住袋相機好鬼攰，三十幾度個太陽又鬼咁猛，一見到風景咁靚，都嗱嗱聲按快門影餐飽。今日有少少風，吹埋個人度好舒服，不過影相就要d耐性，要等風平浪靜影雪山個倒影，好彩有帶埋支腳架set好慢慢等，又set埋個閃光燈玩下自拍 (因為背光)，些處地方大，用腳架冇問題。今日有好多人都到這裏曬太陽同野餐，不過有得遮陰地方唔多，怕曬怕熱就趁早霸個好位。

玩飽食醉，下午三點幾就回程，我都好唔捨得下山，回程見到好多五顏六色的降傘，因為唔想換鏡冇影到，剩係睇住羊太用支18-200 狂開火。Cable car station附近有個game 叫 First Flieger ，鐘意速度嘅朋友可以玩玩 (可以去youtube 找片睇下)，個斜度同長度我就覺得勁個Jungfraujoch那個。

回程先到coop買餸，呢間coop冇燒雞賣，另外仲有一間士多都可以買餸，不過一樣地貴。買完返apartment洗個臉又出發去 Staubbachfall。去到中途站個天開始毛毛細雨，一陣陣風吹埋個身度真係有少少寒寒地。好快到左Lauterbrunnen 個車站，一路都有毛毛雨，個心都打定輸數，抱住到此一遊的心態去睇下。行左十幾分鐘就見到個瀑布，一點氣勢都冇。好失望，穿過下邊一條隧道同上左幾”十”級樓梯，去左邊? 開頭以為會有個靚位影相，點知行到盡頭就係身處瀑布裡面，望出去成個水廉洞咁，又黑又濕。諗來諗去都唔知個d postcard 係邊個位影，成身濕晒又氣喘喘，今日鳴金收兵。個天真係送大禮，返車站個段路落大雨，冇計，冇帶便利雨衣，變左隻落水狗。點知又估佢唔到，上到火車佢就停雨。’

瑞士自由行 Day 2 - Jungfraujoch上光秃秃

Day 1 – 4 我在 Grindelwald 找了一間民宿，相信大家在其他blogs (特別是台灣的! ) 會發現 Haberdarre (http://haberdarre.grindelwald.ch) 的名字。老房東Alice英文很好，很友善，跟她聊天知她由少到大都一直住在Grindelwald這個地方，舊屋就在民宿對面山的山腰，(她指了給我看，其實我看得不太清楚)。她說我們來得及時，因為一星期前山上還下著雪，路面還結著冰，怎知這星期熱到三十幾度，成個星期都是藍天没下雨。

我在此租了一個在地下一樓的apartment，包廚房同浴室，還有對著Mt. Eiger的露台。早上六七點個太陽會照住個山頂，空氣清新，歎住咖啡食早餐真寫意。價錢四晚只係三百幾CHF。因為呢幾日都係自己去超市買餸煮，個銀包都未太縮水。不過瑞士個生活指數真係高到你唔信，撞正呢幾個月歐債推高CHF左唔少，各位朋友真係要留意留意。

Grindelwald 不大，不過去Jungfraujoch同 First 就好方便，上山前記得上網check下山上的天氣，唔好天就唔好上，一定失望。因為最初計劃行一兩日山，所以去車站買左張5days Pass (www.jungfrau.ch) 火車票 ，同到Jungfraujoch的入場票，記住show張Swiss pass 攞discount 同埋timetable 就可以出發。

火車上山要坐左手定右手邊? 第一程去Kleine Scheidegg 我坐右手邊睇風景，影相就不必了，因為架車好快，可以到中轉站後再等遲一班車，然後先影個夠，順便準備定jacket上雪山。呢度可以聽到牛鈴聲，好似大自然大合奏。 第二程車大都係在山洞入面，坐邊都一樣，每個站都會停一停俾人去checkpoint影相，我當然無去，呢個時候有個位坐重要d ，因為勁多人，情況似搭地鐵去中環返工。

大約十一點度上到Jungfraujoch，個天好藍，一望無際，呢度個view 好壯觀，雖然今日得八度，個太陽伯伯都好落力照住我地，唔太凍，影左唔少相。呢度記得帶太陽眼鏡同搽太陽油，我忘了搽防曬，跟住成個星期隻手同塊面又紅又黑，自己都嚇親。今日係遊樂場撞到一大班人企定定頭昂昂，個個人部相機都對準兩個大男人，兩個原來都玩到一絲不掛條條fing，真係眼界大開。呢度坐直升機要先在山下預訂，請留意。

下山時可以係Eigergletscher落車，附近有個湖幾靚，可以影下相，再行落去Kleine Scheidegg，羊太叫左我幾次落車我都冇反應，就咁眼白白睇住加火車開走左，失敗。呢個站有間便利店，點解咁記得? 因為我見到一箱箱辛辣即食麵同一大團韓國人食緊!!! 成個trip好似得呢度見到有辛辣麵賣。

瑞士自由行 Day 1 - Swiss 我來也 !

瑞士自由行 (2011八月中旬 – 九月)



難得有一個悠長假期，真係長到幾時完都唔知個種，便決定跟太太在這個暑假來個瑞士自由行。之前我從未踏足過歐洲，要計劃去瑞士旅行真的不易。到書局買旅遊書，上網找資料，策劃行程，買機票，swiss pass，訂民宿，的確是一腳踼。今次把手頭上的資料整理整理，同大家分享一下。

瑞士的背景不多說，先介紹這次行程的安排：

Day 1: Singapore > Zurich > Grindelwald               (住：Grindelwald)
Day 2: Grindelwald (Jungfraujoch)                          (住：Grindelwald)
Day 3: Grindelwald (First)                                      (住：Grindelwald)
Day 4: Bern                                                           (住：Grindelwald)
Day 5: Gruyères > Grandvaux                                (住：Grandvaux)
Day 6: Vevy > Montreux > Zermatt                        (住：Zermatt)
Day 7: Zermatt                                                       (住：Zermatt)
Day 8: Zermatt                                                       (住：Zermatt)
Day 9: Zermatt > Bellinzona                                   (住：Bellinzona)
Day 10: Bellinzona > Lugano                                  (住：Bellinzona)
Day 11: Bellinzona > Maienfeld                              (住：Maienfeld)
Day 12: Maienfeld > Luzern                                   (住：Luzern )
Day 13: Luzern > Zurich                                        (住：Zurich)
Day 14: Zurich > Singapore      


星航有直航到Zurich ，全係a380。怕人多同坐廁所位，最後選Finnair，到Finland 轉機，早上十點到Zurich，時間都幾好，又平d，返正第一日都係休息冇節目安排，可惜佢唔途經香港。坐瞓左十二個鐘到Finland Helsinki 機場，成個機場全都係賣姆明手信，好彩冇Euro係身，否則先出血。再坐三個鐘機就到 Zurich，當地時間早上十點。

成兩年冇去旅行，今次我帶晒所有攝影器材上身，好鬼重。Canon 50D, Canon 350D, Sigma 10-20, Canon EF 24-105，Canon EF 70-200mm，Canon EFS 18-200 (今次特登買俾羊太用的)，兩支閃光燈同埋支腳架，好大陣仗咁，實行有殺錯，冇放過。

我個行李箱比較大，裡面有食材，電煲，電水煲... ... 雖然入面仲有空間剩，但當上落火車時要上落一兩級樓梯就好唔方便，下次都唔帶咁大個行李箱去旅行。

Zurich機場去火車站都幾容易，指示好清楚。先到櫃位activate張swiss pass，個服務員問我地去邊，印左一張火車行程表，真貼心。今日好多人，可能係星期六，架火車勁爆，最後被迫去坐火車中間的restaurant。又熱又渴，點了兩支nestle 檸檬茶飲，好貴，不過坐低坐又唔好意思唔落order。有幾貴?? 睇下個menu 就知 。