終於扚起心肝寫埋上半年最後一次出trip。六月頭返左香港十幾日工幹，話就話返自己地球，不過日日都要開會，同埋陪老細，冇咩私人時間，好多新malls 都冇點行過，唔喺羊太太帶路都真喺唔知埞。呢十幾日羊太太當然用盡佢所有時間同班friends玩餐飽，呢種機會難能可貴，只要唔好用盡我份糧，我都一於少理。咁啱羊太太識得個friend 喺同一間酒店返工，check in 時upgrade左間無敵維港景套房，爽。
返到星球都冇一個禮拜，期待以久終極一trip終於起行，今次要去南韓濟州jeju同首爾seoul成個星期，當然係我悉心安排之下，呢個星期有無限可能，最重要係羊太太同行，因為有佢按排細節，我可以放心開會。想知 Jeju 有咩特別，可以睇下youtube: http://www.youtube.com/watch?v=VN3pudaZFeQ&feature=related。
星球冇直航機到濟州Jeju (http://english.jeju.go.kr/)，要先坐星航到首爾ICN，再到Gimpo機場轉機。我哋星期五晚出發，要星期六午三點幾到jeju酒店，真係幾攰。當然，呢個數喺計埋喺Gimpo機場間Lotte Mall (http://gimpoairport.lottemall.co.kr) shopping 嗰粒幾鐘，唔好睇少呢粒鐘，羊太太就喺呢度買左一幅合心水嘅黑超，為呢個shopping trip 揭開左序幕。
今次Jeju Trip 住 Lotte Hotel (www.lottehoteljeju.com/en/)，由Jeju機場去酒店都要半粒鐘 (機場唔大，記得去遊客counter 攞中文同韓文版地圖)，酒店間房超大，韓風feel (冇枱放電腦)，最surprise 係d 靚女侍應識得強國語言，講得準過呢度嘅星人，真係靚得嚟又有親切感。呢間酒店唯一唔好喺坐落渡假區，成排得幾間出名酒店，想揾平民不食就要搭的士行遠少少。第一晚未熟架部步，只好到附近食韓燒，點左個黑豚肉，當然有叫碗排骨人參湯，仲有一隻鮑魚仔，都算地道，奇就奇在原來佢哋唔會為腌下d黑豚肉，成條連黑毛肥脂一齊上，真係童叟無欺。
濟洲好難揾巴士，好似見到一架會途經酒店附近，不過因為時間唔多，最後決定book架的士半日遊山玩水，約130,000 won，夠唔夠豪 !
第二朝一早四點幾就起身出發坐的士去【城山日出峰】(http://big5chinese.visitkorea.or.kr/cht/SI/SI_CH_2_1_1_1.jsp?cid=332616)，可算是羊太太為我安排嘅重頭戲。由酒店出發車程約個幾鐘，我全程被睡魔征服，再加上要天黑黑摸幾百級樓梯上山，上氣唔接下氣咁，真攞命。不過見到個太陽係火山口上破雲而出，嗰個moment除左個句 “值得嘅”之外，真係要多謝羊太太肯瞓少四五粒鐘陪我癲。天光後先發現呢處地勢奇特，火山口，懸崖，港灣，組成一組曲線，可惜五臟廟發惡，只好急急腳落山去左附近食鮑魚粥醫肚。由羊太太帶路 “肓中中”入左間local舖開始，然後雞同鴨講咁落order，再等了又等嗰碗熱辣辣鮑魚粥，我個心一直都有少少擔心我哋唔知叫左d咩。不過碗粥真係好鮮甜，大大碗，不過都幾貴，兩碗要成52,000 won。
第二個目的地喺【涉地可支】(http://big5chinese.visitkorea.or.kr/cht/SI/SI_CH_2_1_2_1.jsp?cid=332619)，當然要叫醒個的士叔叔先。呢處風景唔錯，唔怪得喺韓劇拍攝熱點，仲記得教堂附近那個敎情侶學唔知邊套韓劇親熱嘅腳板印，不過我都係鐘意崖邊驚濤駭浪嘅場面，睇浪花，聽風聲，掃走城市嘅噪音。崖邊對出有個小島，有好多人釣魚，風高浪急，外來嘅遊客真係幾難去。
時間過得真“慢”，個錶仲係八點幾，不過要出發去【Trick Art Museum】(http://www.trickart.co.kr/)，呢個地方都幾過過癮，不過真喺要一早去同上佢個網温下書先，人潮一多想就位影下相都幾難。我哋就玩咗成兩個幾鐘，由小貓三四隻玩到成館都喺人，可見佢幾有吸引力。
瀑布係本人最鐘意嘅自然風景，自從呢幾年過到嚟“星”球，呢個咁澎湃嘅景觀可算喺絶左跡。緊隨Trick Art Museum，羊太太安排左個戶外TRIP去【正房瀑布】 (http://www.visitkorea.or.kr/cht/SI/SI_CH_2_1_1_1.jsp?cid=332586)，呢個瀑布都幾特別，除左因為會感受到瀑布直流入海嘅氣勢之外，仲遇會到位中國歷史人物名字 - 徐福。呢位求長生之士竟也留其名此處，唔之佢歸天之時，有冇留下咩野長生不老丹 !! 附近嗰【天地淵瀑布】(http://big5chinese.visitkorea.or.kr/cht/SI/SI_CH_2_1_2_1.jsp?cid=332795) 就真冇睇頭，枉稱三大瀑布，留唔夠十分鐘就走。呢一閃，就用埋司機叔叔最後一個order，閃返酒店。
休息左一個下午，傍晚call taxi 去西歸浦市中心揾飯食，唔知喺唔喺星期日關係，今晚好冷清，揾左好耐先揾到一間地道菜館，門口放左缸海鮮，我哋當然唔會放過啦。點左一條海鮮整生魚片，一個海鮮火煱，再加埋個海鮮pancake，個肚超滿足。呢晚個海鮮大餐好鮮味，如果唔係第二日要開會，一定隊幾罐啤酒。
喺濟州最後一日開左半朝會，一d進展都冇，個人都冇咩心機，疊埋心水去【天帝淵瀑布】(http://www.visitkorea.or.kr/cht/SI/SI_CH_2_1_2_1.jsp?cid=332566)散下心。要揾齊三個天帝瀑布都幾喘氣，不過都三個景都幾特別，第一號瀑布d水就氣弱游絲，(查實咩都冇)，池水呈藍色，令人回憶起九寨溝，不過呢處影相就要攀下石頭，事關個瀑布對出係一大堆亂石。二號瀑布就好d，對出仲有觀景台對正個瀑布，set腳架自拍都冇難度。三號瀑布水量都唔錯，不過就冇位影相，好多樹枝樹葉擋住個view。
最後一個鐘同羊太太兩個人沿住沙灘慢慢行返酒店，好多型男玩滑浪，羊太太攞住支200 起勢zoom，都唔怪得佢，事關佢枕邊人冇咁大舊腹肌。
